Оваа кривична пријава е дел од процесот на тотално растурање на институциите, на вредносните системи, на државата, на смислата на државата. Ова е акт на обездржавувањето не затоа што Македонија не би можела без Фрчкоски, туку затоа што ова е дел од процесот на требење на паметта, на науката, на јазикот, на способноста да се продуцира умен вишок на вредноста, што, всушност, е требење на смислата на македонскиот национален и државен проект како ѓубре.
Бранко Тричковски
Најсериозното дело за кое може да н…е поранешниот амбасадор во Обединетите нации, е “исплата од касата на мисијата за поправка на службеното возило без согласност од мнр”.
Јас не сум правник, но вака од страна гледано, тоа ми се чини особено тешко дело.
За “пречекорување на дозволениот износ за мобилен телефон” може да добие десет години.
Судот ќе го праша професорот зошто кога Гутиереш му се зазборел на предметниот мобилен телефон, обидувајки се да најде решение за некој светски проблем, Фрчко не му рекол, извини Антонио, ми истече лимитот на телефонот, морам да прекинам.
А можеби и не бил Гутиереш.
Можеби била Ким Кардашијан?!
Тешко ќе помине и со “трошоците за репрезентација над дозоленото ниво”.
И за авиобилетите за смртен случај во фамилијата, платени од сметката на мисијата, но вратени од личните пари на професорот.
Макар што уредените држави тие работи ги плаќаат од буџетот.
За парите од продажбата на објект на СФРЈ добиен со сукцесијата, кои поради локалните прописи за гаранции, со одредена временска дистанца, се префрлени во буџетот, ќе биде забавно да се слушаат обвинителските напори од ш…..т на власта да извади трн.
И така натаму и така наваму, драги пријатели.
Професорот во последно време е медиумски доста активен и ја демонтира лажната слика за Македонија што ја сликаат аматерите на вмро, што кај јавноста наидува на извонреден одглас, а што чипираните идиоти оцениле дека сето тоа станува опасно за нив.
“Куклата од воздух”, што би рекол Харуки Мураками, демек човекот од мнр, чии мишелинки за дневна шминка трошат повеќе отколку вишокот за мобилен телефон на професорот Фрчкоски за три години, не ја покренуваат оваа рекордно смешна и истовремено трагична кривична пријава за да го однесат професорот в затвор, не, тие знаат дека и сваровското судство не би сакало да скокне во такви говна, туку работата е да се влече чивекот по судови и процеси, да се валка низ медиумските машини за мелење на здравиот разум и интелектуалните планини, да биде тема, да се отвори како на хируршка маса и да му се ѕирка во цревцата.
После ќе го ослободат.
Или ќе го осудат да го врати вишокот за телефонот и за репрезентацијата и за сервисот “над дозволеното ниво”, кој вешти лица ќе утврдат дека изнесува 300, 500 или 1.000 долари така што на лице место во Њујорк ќе проверат колку пари е штипска пастрмајлија или пица во некој подобар њујоршки ресторан и колку пари чини замена на ауспух за еден мерцедес во автомеханичарска работилница во Њу Џерси.
Плус три години, условно на пет.
Тоа е “Абу Граиб” на вморонски начин.
Без крпа на лицето и вода за гушење, без физичко с…..е по неговите дела и капки врел зејтин во едното, па во другото уво.
Чиста тортура.
Тоа ќе биде и убав, атрактивен дефокус од неверојатните вишоци г…а, над сите дозволени нивоа, со кои власта ја усмрдува Македонија и ја претвора во безопасно јаловиште. И, истовремено, порака до последните остатоци од слободоумноста, демек, со кого си имаат работа.
Тоа е, почитувани.
Оваа кривична пријава е дел од процесот на тотално растурање на институциите, на вредносните системи, на државата, на смислата на државата. Ова е акт на обездржавувањето не затоа што Македонија не би можела без Фрчкоски, туку затоа што ова е дел од процесот на требење на паметта, на науката, на јазикот, на способноста да се продуцира умен вишок на вредноста, што, всушност, е требење на смислата на македонскиот национален и државен проект како ѓубре.
Не, не претерувам, не се секирајте.
Премиери, министери и други политички термити, кои на светски турнеи ги носат сопругите, децата и другарите од гимназија и војска кои сега се началници и директори, јасно покажуваат дека ако Македонија купува авион тоа мора да биде Ербас А380-800Ф, оти сите други не можат да соберат дури и некоја помалубројна владина делегација на прекуокеанските патувања за одбрана на националните интереси и за подобрување на животот на граѓаните и селаните.
Мислам, вишокот над дозволеното ниво на здравиот разум.
На сељаците посебно.
Башка процесот против Фрчкоски е убава порција папаја за македонската раја жедна за малку мака на недостижноста.
Што да се каже за оваа финале?
Јас мислам дека “куклата од воздух” и неговите шефови се з…..е и дека целата операција ќе заврши со тежок пораз на власта.
Од Фејсбук ѕидот на авторот