Блокови стопена лава со големина на трикатна зграда се движат денеска по падината на вулканот на шпанскиот остров Ла Палма Ова следеше по серијата земјотреси што ја потресоа земјата, три недели по ерупцијата на вулканот, објави шпанскиот Национален геолошки институт (ИНГ).
Во соопштението се наведува дека во текот на денот биле регистрирани 21 сеизмички движења, а најголемото имало јачина од 3,8 степени, а засегнати се селата Мазо, Фуенкалиенте и Ел Пасо.
„Блокови од вжештена магма се движат по падината на вулканот Кумбра Виеха, а вулканот почна да ги еруптира по колапсот на северниот дел од вулканскиот конус. Колапсот на северниот дел од вулканот Кумбре Виеха предизвика ослободување на големи блокови материјал и појава на нови потоци што минуваат низ веќе евакуираните области“, пишува во објавата на Твитер на шпанското Министерство за национална безбедност.
Лавата, чија температура достигнува 1.240 степени Целзиусови, ги уништи последните преостанати згради во селото Тодоке, објави Институтот за вулканологија на Канарските Острови.
Од 19 септември, лавата уништи 1.186 згради и 493 хектари земја.
Околу 6.000 луѓе беа евакуирани од своите домови на островот Ла Палма, кој има околу 83.000 жители.