Собранието одлучи парите што ги доби од Буџетот за кампања за референдумот да ги додели само на телевизии и на радио станици. Се работи за повеќе од 700 000 евра, колку што останаа на посебната собраниска сметка. Од Владата беа префрлени вкупно 80 милиони денари односно повеќе од 1,3 милион евра. Од овие пари, повеќе од 500 000 евра беа предвидени за кампања против Договорот со Грција, но беа вратени на Буџетот, откако ВМРО ДПМНЕ побара парите да се пренаменат за други цели.
И претседателот на Собранието Талат Џафери денеска потврди дека Координативното тело на Собранието за водење на референдумската кампања донело одлука парите да се поделат само на телевизиите и на радио станиците.
На прашањето, зошто се исклучени интернет порталите и весниците, собраниски извори велат дека ,,Координативното тело одлучило дека не може да ги подели парите на сите медиуми кои се пријавиле до ДИК во законскиот рок и затоа одлучило парите да се поделат само по телевизии и радио станици“.
Пратеници од Координативното тело исто така, додаваат дека одлуката била донесена во согласност со упатствата на ДИК.
Од Државната изборна комисија упатуваат на Правилникот објавен на нивната интернет страна во кој се регулира и јавната пропаганда, каде што на ниту еден начин не се исклучени електронските медиуми и весниците.
Во овој сегмент од правилникот во кој се регулира дека овластениот предлагач може да води јавна пропаганда пишува дека ,,за јавна пропаганда ќе се смета јавно собирање и други јавни настани организирани од страна на овластениот предлагач, јавно истакнување на плакати, медиумско и интернет претставување….. радиодифузерите, печатените медиуми и електронските медиуми (интернет порталите) да утврдат ценовници за платена пропаганда за референдумот.
Претседателот на ЗНМ Насер Селмaни вели дека никој не може да ги дискриминира медиумите при распределба на јавни пари.
„Повторно се пумпаат пари во телевизиите кои не знаат да работат по пазарни цени, а со кои власта покажува дека сака да ја одржува врската“, вели Селмани. Тој додава дека доколку се работи за приватни пари, секој може да одлучи каде ќе се рекламира, но за пари од буџетот, не може да има дискриминација.
До ДИК 65 телевизии и радио станици доставиле ценовници. Џафери кажа дека имаат право да откупат медиумски простор по 9 минути во час и дека медиумскиот план ќе биде објавен на веб-страната на Собранието.