Претставниците на политичките партии ВМРО-ДПМНЕ, СДСМ, ДУИ и ДПА на денешната нова рунда преговори постигнале договор, изјави амбасадорот Џес Бејли по завршувањето на средбата.
Според него, четирите партии, ВМРО-ДПМНЕ, СДСМ, ДПА и ДУИ се договориле техничката влада да биде формирана 100 дена пред одржувањето на изборите. Следната средба на партиите ќе се одржи до 31-ви Август. На таа средба партиите треба да направат проценка на имплементацијата на Договорот и да закажат датум за избори.
Законските решенија донесени од страна на ВМРО-ДПМНЕ и ДУИ кои се однесуваат на министерството за внатрешни работи и ингиренциите на министерот се суспендираат до 1. јануари 2017 година.
Од деновите од објавувањето на резултатите од изборите, до формирање на новата Влада, министерската функција во МВР за првпат во историјата ќе ја извршува Албанец, потенцираше преговарачот на ДУИ, Артан Груби.
Тоа значи дека министер за внатрешни работи, во краткиот период кој следи до именувањето на новата влада, ќе биде сегашниот заменик-министер Агим Нухиу, откако ќе се повлечат најпрво сегашниот министер Митко Чавков, па министерот од Пржинската влада, Оливер Спасовски, се до именувањето на перманентниот министер кој ќе треба да дојде од партијата која ќе победи на изборите.
Бејли рече дека партиите се обврзале на исполнување на итните реформски приоритети од Извештајот на Прибе, имплементација на Охридскиот договор и почитување на работата на Специјалното јавно обвинителство (СЈО).