Веста за приведување на познатата македонската актерка Силвија Стојановска крена голем прав во јавноста. Со полициска прудружба, вчера попладне, таа беше изведена пред судија на претходна постапка кој и одреди куќен притвор во траење од 30 дена додека нејзиниот партнер Воислав Будисављевиќ заврши во притвор. Засега ниту една од надлежните инсистуции не открива детали околу овој случај за кој јавноста има многу прашалници: дали има и каква е улогата на Стојановска во случајот со трговија на големо количество на кокаин, дали е жртва или директен соучесник во скандалот, кој е нејзиниот партнер Будисављевиќ, какво е негово криминално досие, итн.
Будисављевиќ, сепак, не е непознат за овдешната јавност. Пред десет години (2009) беше партнер и на Персида Момировска, алијас „Мадам Пепи“, која ја снабдуваше со брендираната гардероба од Германија и од Италија, дури и српската естрада, но и со кокаин од Перу кој наводно го набавувал токму Будисављевиќ. Момировска „падна“ во раце на полиција и беше осудена на пет години затвор што не беше случај и со Будисављевиќ кој успеа да пребегне во соседна Србија. Во Македонија беше екстрадиран по четири години од избивање на скандалот и распишаната меѓународна потерница. Го испорача Белгија која патем го уапси во 2013 година за извршени кривични дела и на нејзина територија за издржување на три пол годишната затворска казна што ја доби во отсуство за фалсификување на лични документи во земјава.
Неофицијално, случувањата во Македонија на некој начин се рефлексија на операција на шпанската полиција која во стан на братот на Будисављевиќ открила податоци за трговија со наводни 700 килограми кокаин. Извори од истрагата за Нова ТВ потврдуваат дека станува збор за браќа со дебело криминално досие кои се добро познати на пазарот со наркотици. Тие, сепак, не откриваат детали од комуникацијата со шпанската полиција, односно дали при претрес на станот во Мадрид била пронајдена и дрога како крунски доказ во случајот.
Дел од шпанските медиуми пишуваат дека станува збор за добро организирана група што подолг период била внимателно следена, вклучувајќи ги и финансиските трансакции, притоа нагласувајќи дека поголеми количества на дрога се пронајдени во повеќе градови во Шпанија.
Стојановска, вчера доцна вечерта, на излегување од Кривичниот суд, откако даде исказ, на прашањето дали е приведена поради дрога само кратко одговори „Боже, боже“.