Веќе трет месец нема безглутенско брашно на рецепт за болните од целијаклија и од други автоимуни заболувања, тврдат пациенти кои не можат да го најдат брашното во аптеките.
Ова брашно кое е без глутен го користат пациенти кои во своето тело не смеат да внесат глутен и со години наназад го земаат од аптеките на рецепт, преку позитивната листа. Килограм брашно приватно чини 260 денари, а со рецепт плаќаат 80 денари. На секој од нив му следува по 30 кг месечно. Од него прават леб, за секој ден по еден.
„ Аптеките три месеци не даваат брашно на рецепт, нема да добијат ниту овој месец. Велат, немаат квоти. Нема никаде. Порано го носеа во ланецот аптеки „Зегин“и во некогаш во „Еурофарм“. Од пред Нова година нема ниту грам брашно во ниту една аптека. Вчера пак ги поминав сите. Одговорот од едни аптеки е – не го носевме воопшто, пациентите не го бараа. Од други – немаме, не знаеме кога ќе има. Во Зегин велат не знаеме кога ќе дојде, а и дојде, може да нема квота бидејќи Фондот многу ги намали квотите“, вели скопјанката М. Г која има потреба од ова брашно.
Таа вели дека во Фондот за здравство и кажале да ги пријави аптеките бидејќи тие се должни се да им дадат брашно на рецепт.
„ И да ги пријавам, јас брашно пак нема да добијам“, вели таа. Оваа жена не е единствената која се јави во редакцијата на НОВА. Пациентите се жалат дека ова станува сериозен проблем и дека го немаат основното, брашното од кое прават леб.
Во ФЗОМ велат дека правото на безглутенско брашно на осигурениците им е овозможено да го добиваат на товар на Фондот. Едниот тип на брашно е одобрено како лек на рецепт, а другото како ортопедско помагало, но дали се увезува е сосема друго прашање, велат во ФЗОМ.
„Осигурениците кои имаат проблем со остварување на ова право треба да се обратат кај нас и да посочат во која аптека им е кажано дека безглутенско брашно нема поради потрошени квоти“, велат од ФЗОМ.