Од Комисијата за заштита на конкуренција за НОВА потврдија дека Клиниката за хематологија поднела барање за поведување на прекршочна постапка против двете веледрогерии кои настапиле со однапред договорени енормно високи цени на тендерот за лекот Иматиниб
Пациентите со леукемија(хронична миeлоична леукемија)од денеска почнаа да добиваат од лекот Иматиниб. На Клиниката за хематологија стигнала донација од 100 кутии кои ќе ги покријат потребите на болните од еден месец. НОВА, неофицијално дознава дека донацијата е од „Септима“ една од фирмите учеснички на тендерот која е дисквалификувана бидејќи немала дозвола за промет.
Според информациите од Здружението на пациенти од ХМЛ, пациентите добиваат по една кутија од лекот, а не по една лента како што беше случај во последните 1-2 месеца. Утре ќе биде распишан нов тендер во Министерството за здравство за истиот лек, откако двата последни(на Хематологија и во Министерството) беа поништени. Сепак, неизвесно е до кога пациентите ќе имаат од неопходниот лек со оглед на тоа што тендерската процедура трае долго.
Денеска од Комисијата за заштита на конкуренција за НОВА потврдија дека Клиниката за хематологија поднела барање за поведување на прекршочна постапка против двете веледрогерии кои настапиле со однапред договорени енормно високи цени на тендерот за лекот Иматиниб. Поради ова тендерот на Хематологија беше поништен, а пациентите со хронична миeлоична леукемија 10 дена останаа без лекови.
Во Комисијата не откриваат за кои фирми се работи, но посочија дека доколку се утврди дека има прекршување на Законот тие ќе донесат соодветно решение со кое се утврдува колку ќе изнесува казната.
„Фирмите имаат право да се жалат на одлуката прво до Управен суд, а потоа и до Вишиот Управен суд и доколку Судот го потврди решението на Комисијата, глобата може да изнесува најмногу до 10 проценти од вкупните приходи на компанијата, согласно билансите“, велат за НОВА во Комисијата за заштита од конкуренција.
Стручни лица добро запознаени со случајот за НОВА неофицијално потврдуваат дека станува збор за двете фирми„Македонија лек“ и „Зегин“. Тие објаснуваат дека на тендерот „Македонија лек“настапила со вртоглаво висока цена од 45 000 денари(731 евра) за кутија, односно 1500 денари по таблета од лекот Иматиниб. „Македонија лек“ понудила лек од производителот „Плива“, а „Зегин“ од „Крка“.
По ова, од „Зегин“ се повлекле од тендерот, а„ Македонија лек“ останала со овие високи цени. Само за споредба на претходниот тендер цената на лекот изнесувала 93 денари од таблета, односно 45 евра за кутија.
Инаку, „Македонија лек“ е истата веледрогерија што дистрибуираше вацини против морбили во амбулантите пред истекување или со истечен рок на траење.
Останува да се види, што ќе се случува понатаму. Лекарски извори за НОВА коментираат дека во случајот одговорноста е на Клиниката за хематологија која не го планирала тендерот на време, а згора на се ова е период(во очи на Нова година) кога цените на лековите се најскапи. Тука има простор и за вакви, договорени цени кои се погубни за јавните финасиски средства наменети за лекови. Со ова, Клиниката одлучува за судбината на најтешко болните кои во овој случај останаа без неопходната терапија, што за нив значи живот.