Изразувам силна осуда за воените дејствија кои Русија ги презема над Украина, што неизбежно ќе водат кон ненадоместлива загуба на човечки животи и материјална штета. Инвазијата на Украина од страна на Русија е напад на територијалниот интегритет и суверенитет на Украина, сериозна повреда на основните принципи на меѓународното право, удар врз демократскиот поредок и закана за стабилноста на Европа, се вели во изјавата на претседателот Стево Пендаровски по инвазијата на Украина од страна на Русија.
– Како НАТО членка, се приклучуваме кон повикот на Алијансата насочен кон Русија за прекин на воените дејствија на територијата на Украина. Во име на граѓаните на Северна Македонија, изразувам солидарност со украинскиот народ во овие тешки времиња, вели Пендаровски.
Тој за денеска свика седница на Советот за безбедност на која ќе се дискутира за руската агресија врз Украина.
Седницата ќе се одржи во Кабинетот на претседателот со почеток во 14 часот.