Помина времето кога политичарите од високо гледаа во народот и му кажуваа што треба да прави. Ние сме апсолутно еднакви и јас и премиерот со сите вас, нема погоре и подолу, тоа е новото во македонската политика, кое никогаш порано не било, ние сме исти како што сме биле пред да дојдеме на власт, порача вечерва од Крушево кандидатот за претседател од коалицијата предводена од СДСМ, Стево Пендаровски од каде и официјално ја започна кампањата.
Тој рече дека земјава во овој момент е единствената позитивна вест од целиот регион.
Со мотото „Река за републиката“ вечерва кандидатот за претседател од Алијансата на Албанците и „Беса“ ја почна претседателската кампања од плоштадот „Скендербег“ во Скопје.
Им порача на граѓаните дека нивните гласови не се за тргување и ги повика масовно да излезат на гласање, без разлика на која партија и припаѓаат.
– Со вашиот глас докажете дека не сме анонимни 20 отсто. Докажете дека вие не сте само гласачи, туку и гласани. Затоа, Албанецот и не можеше да биде избран за претседател. Ова ќе се промени на 21 април, кога вие ќе го изберете претседателот. Од вас зависи дали сте за Албанец за претседател на Републиката. Вие сте суверенот што одлучува дали вашиот глас ќе ја направи Северна Македонија мултиетничка и евроатланска Република, рече Река.
На промотивната конвенција во Скопје се обратија и претседателот на Алијансата на Албанците Зијадин Села и претседателот на движењето „Беса“ Биљал Касами.
ВМРО-ДПМНЕ и коалицијата „За подобра Македонија“ ја започнаа кампањата од Охрид каде се обратија претседателскиот кандидат Гордана Силјановска-Давкова и лидерот на партијата Христијан Мицковски.
Силјановска пред охриѓани најави дека ќе биде претседател кој ќе го почитува Уставот и законите, а меѓународната политика ќе ја води преку економска, научна и културна дипломатија кои според неа се многу помоќни од традиционалната. Правото на вето, како што посочи, ќе го користи секогаш кога ќе треба да предупреди на Уставот и законите.
Говорејќи за новото име на државата, Силјановска-Давкова рече дека доколку биде избрана нема да може веднаш да го смени, но оцени дека ова име на земјата ниту има корен, ниту може да има иднина.
– Студентите ги учам дека Уставот е процес, не е состојба, значи ќе дојде одговорен претседател, од народот, за народот и со народот, ќе дојде одговорен Парламент што ќе ја почитува опозицијата и државнички ќе се однесува кон најважните прашања, нов состав на Уставен суд кој ќе го брани Уставот, со знаење и со морал. Тогаш ние еден ден, со уставна промена важна ќе го заштитиме името со клаузула за непроменливост, посочи Сиљановска – Давкова.