Претседателскиот кандидат Стево Пендаровски денеска ја продолжи посетата на малешевско-пијанечкиот регион каде што оствари повеќе средби со жителите на Берово, Ратево и Пехчево како и со жителите од делчевските Звегор и Тработивиште.
Ваква тортура сме немале ни за време на турско, се пожалија жителите на беровско Ратево.
Тонеме во беда и сиромаштија, кредит врз кредит, рата врз рата. Вака повеќе не се живее, порача еден од граѓаните. Само за членовите на владејачката партија има некаков живот.
„Слобода и еднаквост. Сите да сме еднакви, без разлика на која партија си член или воопшто не си член. За спроведување на овие принципи зборувам кога велам дека промени ни се нужни. Имаме шанса тие промени да ги најавиме на 13-ти април“ рече Пендаровски.
Во Пехчево Пендаровски се обрати пред граѓаните кои со внимание слушаа што ќе им каже.
„Да бидам претседател на Република Македонија за мене значи да бидам Ваш претседател. Заедно треба да ја вратиме моќта онаму каде што припаѓа, наместо кај власта да ја вратиме кај граѓните. “ рече Пендаровски.
Во делчевски Звегор жителите посочија дека се чувствуваат понижени од оваа власт и со урнато достоинство поради тоа што лошо се живее.
„Оваа власт толку знае, толку умее, толку е способна. Од нив не можеме да очекуваме ништо ново, ништо поинакво. Тие немаат што да ни понудат. Затоа на овие избори да им кажеме одморете од вашите 24/7 за Македонија да тргне напред. На 13-ти да им најавиме а на 27-ми да им кажеме збогум, и да одиме по вистинскиот пат“ рече Пендаровски.