Претседателот Стево Пендаровски денеска, во рамки на работната посета на Белгија, имаше аудиенција кај кралот на Белгијците, Филип, соопшти неговиот кабинет во краткото соопштение.
Пендаровски и кралот Филип изразиле задоволство од развојот на односите меѓу двете земји што се карактеризираат со цврсто и искрено пријателство. Во пресрет на одбележувањето на 30 години од воспоставувањето дипломатски односи бил нагласен интересот за понатамошно унапредување на билатералната соработка.
Шефот на македонската држава во разговорот со Кралот на Белгијците Филип изразил благодарност за досегашната отворена и конструктивна соработка, како и за поддршката за процесот на македонската интеграција во ЕУ.
На средбата било истакнато и сојузништвото во рамките на НАТО како дополнителен чекор кон заедничкото делување за градење на постабилна и побезбедна Европа.