Стево Пендаровски вчера им се обрати на Штипјани барајќи од нив да гласаат за кандидатот на СДСМ кој повика на граѓанска победа за промени во државата.
„Денес Македонија е раскарана со сите соседи и каска позади сите во регионот. Во нашава држава законите селективно се применуваат. Дури и Рамковниот договор, кој е од суштинска важност за опстанокот на земјава, го сведоа на квота и бројка. Нѐ поделија по секоја основа. Нѐ понижија кога спомениците ги направија поважни од нас, живите“, започна Стево во своето обраќање на големиот граѓански собир во Штип.
Пендаровски зборуваше, но и ги слушаше штипјани, кои вечерва во голем број дојдоа да му дадат поддршка.
„Во нормалниот демократски свет, човекот е пред сѐ. Не може држава без народ. Со нова политичка структура која ги разбира проблемите на младите, возможно е да се спречи масовното иселување. Тоа не се постигнува со лагите кои актуелнава Влада ги применува. Лажат дека ЕУ и САД се распаѓаат. Но, ако е тоа вистина, тогаш зошто нивните скапи роуд шоуа се сконцентрирани токму на барањето инвеститори од таму. Не, не се распаѓаат ниту ЕУ, ниту САД, туку ние финансиски и економски колабиравме “, зборуваше Стево пред насобраната толпа.
Во интерактивниот дел од граѓанскиот собир, штипјани се интересираа за корупцијата во државата, невработеноста, исселувањето, сиромаштијата што ги тишти секојдневно.
„Дали квалитетните кадри после 27 април ќе добијат шанса за практична примена на своето образование и на своите способности, како би дале личен придонес за развојот на нашата земја“, праша една млада штипјанка која присуствуваше на собирот.
„Ќе бидам конкретен“, одговори Стево, „квалитетните кадри ќе добијат шанса ако ги направиме потребните политички промени“.
Штипјани сакаа да дознаат како да се справиме со корупцијата која е во секоја пора на општеството.
„Системска е корупцијата во Република Македонија, која во последната фаза се нарекува држава заробена во криминал. Проблемот е во главата, не во опашката. Предлагам да ја смениме главата, за на сите останати да ни биде подобро“, им одговори Пендаровски и побара масовна граѓанска мобилизација на 13-ти и 27-ми април, како би можеле да ја испратиме пораката дека Македонија заслужува промени и Македонија заслужува вистински претседател.