Во нападот пред хотелот Менделеј Беј во центарот на Лас Вегас, убиени се над 50 луѓе, додека над 400 се повредени. Полицијата соопшти дека напаѓачот е пронајден мртов во хотелската соба и се претпоставува дека се самоубил. Идентификуван е како Стивен Падок (64) пензионер од Лас Вегас.
Американските медиуми објавија дека со 50 жртви, ова е најтешкиот напад во историјата на САД. Претходно најсмртносниот напад беше оној во Орландо минатата година, кога беа убиени 49 луѓе.
Полицијата соопшти дека е лоцирана и жената која била во друштво со убиецот.
Мотивите за нападот и натаму се непознати, но се отфрла дека тоа е тероризам.
Американскиот претседател Доналд Трамп изрази сочувство со жртвите на нападот и нивните семејства.
Полицијата претходно ги потврди информациите дека напаѓачот пукал на присутните на фестивалот на кантри музика „Рут 91 Харвест“, што се одржувал на отворено пред хотелот.
Тој пукал од 32.кат на хотелот.
Очевидци тврдат дека се слушнале над 100 рафали. Уште на првите пукотници, присутните почнале да бегаат.
Полицијата соопшти дека нема претходна евиденција за осомничениот за нападот, ниту пак досега бил пријавуван за некаков прекршок. Полицијата нема ниту информации колку долго тој живее во оваа област.
Меѓу меѓу загинатите има и полициски службеници, но шефот на полицијата на Лас Вегас Џо Ломбардо не го објави нивниот идентитет. Двајца полицајци се и меѓу повредените, од кои едниот е во критична состојба.