Перуанската премиерка Ана Јара е принудена да се повлече од функцијата по гласањето за доверба во Конгресот во понеделникот. Таа ја изгуби довербата со 72 гласа наспрема 42.
Јара е обвинета по наводите дека разузнавачката агенција на Перу со години собирала информации односно ги шпионирала водечките луѓе во бизнисот и политиката.
Претседателот Оланта Хумала сега треба да избира нов премиер и нов кабинет. Според експертите во државата, ова е најголемата политичка криза откако претседателот ја води државата од јули 2011 година.
Според системот во Перу, претседателот е на чело на извршната власт, но аналитичарите велат дека падот на неговата заменичка, изгласан од страна на доминантната опозиција во Конгресот, е знак на неговото опаѓачко влијание.
Ова е прв пат Конгресот после 50 години да замени еден премиер на државата.
Развојот на ситуацијата следи по истражувањето на неделникот Корео Семанал објавено на 19.март, во кое излезе список на Перуанци кои биле шпионирани од Директоратот на националната агенција за разузнавање (Дини).
Според истражувањето, се прислушувале политичари на опозицијата, бизнисмени, членови на воените структури и нивните фамилии. Агенцијата наводно вадела информации и од перуанскиот Регистар за имотите на илјадници Перуанци.
Јара веднаш го отпушти директорот на Дини, како и шефот на Агенцијата за контраразузнавање, ден откако излезе новинарскиот напис. Таа издаде наредба за длабока истрага, и ги негираше сите наводи дека шпионирањето било по нејзино барање.
Сепак, членовите на опозицијата во Конгресот сметаат дека таа не успеала да го исконтролира системот за безбедност и затоа треба да сноси одговорност. Од друга страна, членовите на владејачката партија велат Јара била жртва на политички реваншизам.
Јара е шестата по ред на премиерската функција која служела во мандатот на претседателот Хумала.
Нејзиниот претходник Рене Корнехо самиот поднесе оставка откако неговиот кабинет беше вмешан во скандал со корупција по помалку од пет месеци од неговото работење.