Одговорна власт е онаа која преку макотрпна работа и создавање систем за нови работни места како и економски раст го прави тоа. Ова е една од пораките кои денеска ги испрати вицепремиерот Владимир Пешевски при заедничката прес-конференција со министерот за финансии, Кирил Миноски на која ги презентираа успесите на Владата признаени од „Дуинг бизнис“.
Одговарајќи на новинарско прашање за стабилноста на Фондот за пензиско и инвалидско осигурување околу неговата одржливост, Пешевски посочи дека властите не направиле застој во пензиите, напротив ги зголемиле и редовно ги исплаќале, а од пензионерите “направиле луѓе со достоинствено право на живот“.
– Одговорна влада е онаа што ќе создаде систем каде имате креирање на работни места, економски раст, и тоа го правите без екстремно да ја задолжите државата и да имате умерен или балансиран буџет со умерен буџетски дефицит. ..оваа влада успеа да го стабилизира Фондот со тоа што се изнајдоа средства за зголемување на пензиите во континуитет и нивно навремено исплаќање. Од пензионерите направивме луѓе кои што имаат достоинствено право на живот. И не случајно во изминатите буџети, ние наоѓавме начин за зголемување на пензиите. И сега направивме зголемување без притоа да ја загрозиме долгорочната финансиска стабилност на државата, изјави Пешевски.
Сепак на прашањето на НОВА, дали истите се зголемувани како резултат на неодамна издадената еврообврзница и кредитите од надвор, Пешевски отсечно одговори „Не“.
А токму “таткото на државните пари“, Кирил Миноски кој стоеше веднаш до Владимир Пешевски на прес-конференцијата, претходно апелираше дека издавањето на еврообврзницата било нужно, а парите ќе легнеле во буџетските потреби за 2016 и 2017 година.
Имено, Миноски неодамна, образложувајќи го Предлог-буџетот за 2017 пред членовите на Комисијата за финансирање и буџет, им вети на пензионерите дека во декември годинава ќе го добијат ветеното зголемување на пензиите од 670 денари.