“Ситуацијата е крајно деликатна. Тепаните пратеници не можат да се вратат во тоа што се нарекува парламент, дури и со поголема политичка компензација. Нарачателот нема сам да се казни, а нема да ги казни ниту неговите амбициозни полтрони кои слепо ги извршуваат неговите заповеди.
Ризично е отсуството од локалните избори. Европските функционери одамна не се на нивото на задачата што го бара проектот „Обединета Европа“. Пречесто се непринципиелни, со различни аршини за исти работи, мижат пред недемократски постапки, па дури и фашизоидни.
Јасно е дека сакаат да ни помогнат да го прескокнеме Рубиконот, но не сум сигурен дека е здраво нивното калкулантство со елементарни кршења на човековите права и неретки недемократски постапки. Нема поважна цел од човековите права и слободи. Нема цел што го оправдува нивното жртвување” изјави Петар Гошев во интервју за Утрински весник. Гошев во интервјуто ја коментира и најновата најава за странска инвестиција во Охрид од Индиецот Субрата Рој.
“Во таа низа е и најавената инвестиција на Субрата Рој, крајно нетранспарентна инвестиција во најава, договарана во четири очи, без јавен меѓународен тендер. Не знам што нему му е ветено дека ќе плаќа и нема да плаќа, но бездруго ќе ни вработи еден број келнери и келнерки и ќе отвори еколошка дупка во нашиот најубав и најскап резервоар на вода и природна убавина, вода која можеби по 5-10 децении ќе биде фактор број еден за наше преживување.
Преспанско Езеро се губи, Дојранско е повеќе бара одошто езеро, неслучајно го нарекуваат „ѓољ“. Ќе се префрлиме, можеби на најновата надеж, Дунав – Морава – Вардар – Егеј вели Гошев за Утрински