Можност за таа коалиција постои иако досега од ДУИ не стигнало такво барање до нас, изјави генералниот секретар на СДСМ Андреј Петров во интервју за НОВА. Според него доколку ВМРО-ДПМНЕ коалицира успешно со ДУИ на централно ниво нема причина СДСМ да се обвинува за коалицирање со ДУИ во локалната самоуправа.
Во интервјуто за НОВА, Андреј Петров најави и можност за скорешно организирање на предвремени парламентарни избори.
„Целата констелација на односите и еден антагонизиран антиамериканизам во провладините медиуми како и позиционирањето наспроти ЕУ мене ме потсетува на 2008 и 2011 година и ми дава за право да верувам дека власта подготвува терен за предвремени парламентарни избори“, изјави Андреј Петров.
Коментирајќи го развојот на ситуацијата на политичката сцена во Македонија, Петров не очекува дека предвремените парламентарни избори ќе се случат по постигнување на компромисно решение со Грција.
И покрај оптимизмот на претставниците на меѓународната заедница јас не верувам дека ќе дојде до компромис за проблемот со името, вели Андреј Петров.
Интервјуто со Андреј Петров, во кое тој поопширно зборува за состојбите во СДСМ пред Конгресот на 2 јуни кога треба да биде избран нов претседател на партијата, ќе можете инетегрално да го гледате вечерва во рубриката СТУДИО на нашата веб страница.