Во рамки на денешната официјална посета на Словенија, министерката за одбрана Славјанка Петровска се сретна со претседателот на Словенија, Борут Пахор.
Во фокусот на разговорите беше иднината на Западен Балкан, која е тесно поврзана со европските и евро-атлантските структури, особено во светло на новата геополитичка реалност, актуелните безбедносни ризици кои произлегуваат од руската агресија врз Украина и нужноста од ефектуирање на проектираната амбиција на ЕУ како глобален актер.
Северна Македонија и Словенија се обединети во вредностите и принципите кои гарантираат безбедност и просперитет за регионот, но и за европскиот континент. Двете пријателски земји имаат идентични заложби за мир, слобода и демократија. Двете земји имаат заедничко минато, но уште поважно –заедничка сегашност и иднина, како дел од најмоќниот воено-политички сојуз, НАТО. Нашите држави се еднакво посветени гаранцијата на безбедна, демократска, просперитетна иднина за своите граѓани. А тоа ќе го постигнеме само ако меѓусебно соработуваме, си помагаме, ги паметиме лекциите на историјата за да создаваме нови лекции за пример во иднина, заклучија двајцата соговорници на средбата.
Петровска и Пахор ја осудија руската агресија врз Украина и порачаа дека тоа е удар врз суверенитетот и територијалниот интегритет на Украина и сериозно кршење на основните принципи на меѓународното право. Соговорниците се согласија дека е потребен итен прекин на огнот и решавање на сите отворени прашања по дипломатски пат.
Претседателот Пахор нагласи дека Словенија во континуитет е силен поддржувач на Северна Македонија и дека се залага за забрзување на интеграцијата на државата и регионот во ЕУ.
Претходно Петровска во Љубљана имаше средба и со словенечкиот колега, министерот за одбрана Марјан Шарец.
„Словенија е наш докажан пријател, сојузник и гласен поддржувач на евроинтеграцијата на Северна Македонија. Оваа година одбележуваме 30 години соработка помеѓу двете држави и 28 години одбранбена соработка која остави белег на развојот на одбраната и Армијата. Живееме во комплексни времиња со бројни безбедносни предизвици и затоа како блиски и пријателски земји, и како сојузници во НАТО, мораме да опстанеме на нашиот пат кон уште посилна, уште поинтензивна одбранбена соработка“, порача таа по средбата.