Премиерот Зоран Заев попладнево во Собранието одговарајќи на пратенички прашања сподели дел од мерките предвидени со петтиот пакет за поддршка на граѓаните, работниците, стопанството и економијата.
Една од мерките, како што рече, е да се избришат сите камати по долгови кои граѓаните ги имаат кон државните и општинските институции за долгови постари од три месеци под услов да си го регулираат на 12 рати долгот кој го имаат.
– Тоа значи за вода, за парно, даноци кон државата, кон станбените претпријатија, кон водостопанските претпријатија, се. Најмногу се погодени граѓаните кои дефинитивно не можеле да постигнат да ги плаќаат редовно сметките. Целта ни е не веднаш да го вратат долгот, туку на 12 рати да склучат договори, веројатно ќе го доразработиме со ратите и се, но и да ги избришеме комплетно каматите и со тоа да го олесниме, рече Заев, додавајќи дека намерата е да ги избришат сите камати за долговите кои се за физичките лица и оти со законско решение тоа е возможно.
Во втората фаза, додаде, сакаме да ги помогнеме таргетирано најсиромашните, односно тука ќе биде димензиониран вториот сегмент од петтиот пакет. Третиот пакет ќе биде поддршка на економијата.
– Ќе предложиме еден пакет преку Банката за поддршка на развојот со грантова шема да дадеме безкаматни кредитити за сите погодени од кризата, посебно најтаргетираните, каде што ќе поттикнеме да покажат позивитен успех на крајот на 2021 година. Ако дадеме 10.000 евра грант ќе продуцираме да покажат позитивен успех во 2021 за да мотивираме развој, рече Заев.
Посочи дека ги таргетираат и хотелите надвор од туристичките места за кои сакаат да дадат грантови или одредени мерки, а најави дополнителна мерка и за тутунот. Угостителските објекти и транспортот на патници, додаде Заев, се директно загрозени од мерките на Владата, и тука ќе развијат дополнителни пакети на мерки.
Во однос на медиумите, рече дека исто така се директно погодени бидејќи плаќаат 49 милиони и 500 илјади денари годишно концесии, а треба до крајот на фебруари да ги платат.
– Целта е Владата без какби било интеракции со медиумите да помогне кај АВМУ, а АВМУ ако може да ги ослободи медиумите од таа концесија, тоа е купче 50 милиони денари за сите медиуми, да помогнеме, заклучи Заев.
Тој додаде дека се во завршна фаза на отворен дијалог со синдикатите, со коморите, социјалниот совет и сите заинтересирани граѓани да се развие петтиот пакет мерки кој, како што рече, ќе даде резултати во овие услови.
Одговарајќи за економската состојба во државата и за реализацијата на капиталните инвестиции во земјава, Заев нагласи дека во 2020 година кога во целиот свет е пандемија, ние имаме едни од најдобрите резултати на европскиот континент.
Во делот на енергетиката, Заев рече дека за прв пат има заинтересирано 10 големи компании за хидроцентралата Чебрен и Галиште.
– После 30 години зборување за овој проект да успее, ќе успее Чебрен, затоа што ја имаме најголемата француска, двете најголеми австриски, најголемата грчка, најголемата шпанска, една турска, две кинески и други европски компании, вкупно 10, од кои 9 ја поминаа првата фаза. Проектот е вреден 800 милиони евра. Проектот е џиновски, го подигнува БДП, создава нова регионална батерија во делот на балансирањето на енергијата во целиот регион и огромно производство, преку 300 мега вати на хидро-енергија. Се работи за комплетно еколошки сработен проект, рече Заев.
Тој ја повика опозицијата да застане заеднички кога се работи за проектот за Клиничкиот центар во Скопје, за кој, како што рече, обезбедена е локацијата, донесен е урбанистичкиот план, се изведува инфраструктура, водовод, пристапен пат, гас, напојување, а има интерес од познати инвеститори.
– Да застанеме заедно зад стратешките интереси, овие блокади во Парламентот знае нашиот народ кој ги прави и колку тоа чини за економскиот стандард, апелирам да им служиме на граѓаните и државата, повика Заев во Собранието, каде е во тек седница посветена на пратенички прашања.