Ми требаше време да се смирам и да се одморам од мојот денешен испит. Мојата МАТУРА. Македонски јазик и литература. Неколку часа поминаа, а јас сѐ уште се прашувам КОЈ и ЗОШТО има потреба да ги обезличи сите наши напори да бидеме добри во тоа што го правиме?! Кој тоа со ИМЕ и ПРЕЗИМЕ ги составува овие тестови кои треба да го проверат нашето знаење? !
Знаат ли воопшто, одговорните за овој матурски испит што значи тест на ЗНАЕЊЕ кој патем, се полага на материјал од цели ЧЕТИРИ години ? !
Ја знаат ли психологијата на матурантот???
Имаат ли елементарно знаење од содржините кои беа дел од прашањата???
Ученик сум во една скопска гимназија. Сите четири години постигнував високи резултати. Се подготвував за мојата матура како за вистински испит на мојата зрелост и одговорност. Пред себе, пред моето семејство и пред системот во којшто за несреќа сум вклучен. Но, искрено не можам да ја разберам таа силна потреба да се обликува МАТУРСКИ ТЕСТ што треба да покаже дека сме „НЕПИСМЕНИ“ и дека „НЕ ЗНАЕМЕ“!
Темата на матурскиот есеј „Вината на трагичните јунаци во делата на старите литератури “ е целосно контраверзна и предмет на оспорување. Насоките коишто ни беа дадени уште повеќе создадоа забуна. За кого, авторот на оваа тема очекуваше да пишуваме?! За Гилгамеш, за Ахил, за Едип, за Антигона?! Каде Аристотел воопшто пишува за ТРАГИЧЕН ЈУНАК и ВИНА?!!!
Учевме за Аристотел. Ја читавме неговата „Поетика“ (глава 13) . Каде, каде вие одговорни ги најдовте овие ваши поими?!
Каква е врската помеѓу вашиот трагичен јунак и ВИНАТА?! Учевме за трагедијата (Аристотел) , за трагични ликови и „трагична грешка“, учевме за ликовите на старите литератури , но во ниедна теорија на литературата не ја пронајдовме вашата „вина“ како категорија.
Знаете ли вие воопшто дека моите другари и другарки од стручните училишта, во наставната програма воопшто ја немаат „Антигона“, на пример?! И дека „Илијадата“ ја читаат САМО со шестото пеење?! Знаете ли дека, ние гимназијалците, во прва година, според НАСТАВНАТА ПРОГРАМА воопшто не ја работевме оваа трагедија?! Кој ви дава за право да ДИСКРИМИНИРАТЕ?!
Како очекувате, вие пресвети, таму „горе“ да ви одговориме на вашите задачи, ако тоа воопшто не сте го предвиделе со наставната програма за средно образование?! Или ја „бутнавте“ во програмата за матура, независно што поминале четири години?!
Како ги ставивте во ист кош сите овие пропусти?!
Зошто одговорните за подготовка на овој испит не излезат јавно и не објаснат ШТО очекуваат од една ваква тема? Од еден ваков тест на ЗНАЕЊЕ?!
Ова ли беше испит што требаше да ги даде нашите вистински знаења?!
Срам ми е што на мојот испит отидов со толку непреспиени ноќи. Жал ми е и за сите мои другари и другарки со кои учевме со цело срце.
ИЗЛАЖАНИ сме !!!
Излажани сме со наставна програма за матура. Излажани сме дека ќе имаме соодветни теми за правопис, но не и темата Имиња на жители , кои ни ги подметнавте! Излажани сме дека ќе имаме теми од Словенската писменост, но не и прашања на кои нема одговор во нашите учебници. Каде, каде во учебникот на моите другари од стручните училишта пишува, почитувани одговорни „Каква азбука се користела во Преславската книжевна школа?!“
Сте ги виделе ли вие воопшто учебниците од кои тие учат ?! Не е ли суштински поважна за нас, Охридската книжевна школа ?!
Како е можно да немате претстава што барате?! Што треба ние да научиме за да го задоволиме вашето НЕЗНАЕЊЕ???
Срам ми е што се соочуваме со ситем во којшто НЕПИСМЕНИТЕ ги оценуваат тие што знаат. Срам ми е , што овде НЕЗНАЕЊЕТО креира критериуми за успех.
Жал ми е за мојата генерација најдобри ученици кои денес разочарани се вратија дома. Излажани и изневерени од системот на којшто му ги посветивме своите најубави години, својата МЛАДОСТ, ЗНАЕЊЕ и УМ!!!