Во торба оставена во близина на плажа на островот Родос, крајбрежната служба на Грција открила 44 пакувања со 88.880 наркотични таблети „Каптагон“ што се нарекуваат и „дрога на џихадистите“, јави дописничката на МИА од Атина.
Како што соопштија од грчката крајбрежна служба, поради близината на морето, дел од пратката била натопена со морска вода што ги уништила таблетите.
Поконкретно, од 44-те пакувања, уништени биле наркотичните таблети во 27 пакувања, со вкупна тежина од околу четири и пол килограми, дел од дрогата била уништена во 12 пакувања со тежина од над 13 килограми, а пет од пакувањата биле празни.
Вкупната проценета количина во 44-те пакувања е 88.880 таблети. Централната пристанишна служба на Родос, која спроведува истрага, ја конфискуваше дрогата и ќе биде испратена за дополнителна анализа во Хемиската служба на Родос, соопштија од грчката крајбрежна служба.
На фотографијата што ја објавија заедно со соопштението, на пакувањата со таблети „Каптагон“ има лепенки со свастика.