Поради глобалната криза со коронавирус, Владата на РСМ носи пак мерки со кои директно се помага на граѓаните. По реализацијата на проектот купувам домашно и туристичките ваучери, сега граѓаните ќе добијат и по 6.000 денари на своите трансакциони сметки. За ова да се реализира треба измените на законското решение да поминат во законодавниот дом, а тоа е неизвесно кога ќе се случи.
КОЈ ЌЕ ДОБИЕ ПОМОШ?
Државната помош од 6.000 денари пензионерите, самохраните родители, невработените и младите до 29 години, ќе треба да ја искористат за неколку дена, откако ќе им легнат парите. Лицата со месечни примања под 15 илјади денари, евидентирани во ПИОМ до 27 октомври ќе добијат помош на трансакциската сметка во банката, со која ќе потпишат договор во рок од 5 дена по влегување на законот на сила.
Конечната листа на корисници пак, со име, презиме и банка каде ќе се врши уплатата, Генералниот секретаријат ќе ја објави на www.kupuvamdomasno.gov.mk во рок од 8 дена по стапување на сила на законот, а за самохраните родители на кои статусот го утврдува центарот за социјални работи во рок од 12 дена.
За лицата пак, кои ќе поднесат приговор, Ген секретаријат ќе им одговори и ќе достави конечна листа до банките во рок од дваесет дена. Со овие пари граѓаните нема да можат да купуваат каде што сакаат, туку само во објектите кои ќе се регистрираат на интернет страната Купувам домашно, во рок од 5 дена по изгласување на законот.
ЗА ШТО МОЖЕ ДА СЕ ИСКОРИСТИ?
Парите нема да може да се подигнат во кеш и со нив нема да може да се плаќаат производи и услуги на фирми кои нема да се пријават како даватели на услуги. Помошта треба да се искористи до 25 декември. за што Владата издвои 27 милиони евра.
„Платежни картички нема да се печатат за да се спречи гужвата пред банките и да се заштити здравјето на граѓаните, но и за да се намалат трошоците, затоа што сега нивната изработка би била на терет на државата“, вели Фатмир Бесими – министер за финансии.
Од Владата засега немаат одговор како ќе се контролира дали оваа помош ќе се употреби за купување македонски производи, со цел да се помогне домашната економија.
И ФИРМИТЕ ЗАИНТЕРЕСИРАНИ ЗА ДРЖВНА ПОМОШ
Над 13500 барања се одобрени за финансиска поддршка за исплата на плати на вработените за месец октомври 2020 година, а веќе е исплатена на скоро 12000.
„Вкупната исплата досега изнесува 907.292.339 денари, а опфатени се 58 302 вработени. Во тек е процесирањето на исправките на обрасците БФП-ИП/2 и образецот за Месечна пресметка за интегрирана наплата (МПИН), по чија обработка Управата за јавни приходи дополнително ќе информира со соопштение“, велат од Управата за јавни приходи.
Оваа мерка е дел од четвртиот пакет економски мерки, и се однесува за поддршка на работодавачите за исплата на плата на вработените во последните три месеци од оваа година, односно за октомври, ноември и декември.
Има и такви бизнис кои се жалат на последните мерки на Владата. Пример се свадбените работници, кои велат дека не можат да аплицираат за новите мерки за финансиска поддршка иако им стојат на располагање. Многумина од нив кои се со неколку вработени не ги исполнуваат условите. Бараат државата да донесе мерки со кои ќе бидат опфатени само малите бизниси.