Руските власти покренаа истрага по видео снимката од силување на еден затвореник што ја објави невладина организација, која тврди дека примила стотици пријави за систематска тортура во руските затвори.
Невладината организација Гулагу.нет на социјалната мрежа „Телеграм“ објави страшна видео снимка од силување во траење речиси три минути. Снимката била направена на 18 април во 2020 година во болничкото одделение за затвореници кои страдаат од туберкулоза во Саратов, во централниот дел на Русија.
Од гулагу.нет тврдат дека примиле над 1.000 снимки од тортури во затворите. Затворениците се малтретирани со цел од нив да се извлечат признанија или да соработуваат со чуварите.
Снимките ги испрати поранешен белоруски затвореник кој престојувал во Саратов, изјави директорот на гулагу.нет, Владимир Осечкин, кој живее во егзил во Франција.
Руската затворска служба денеска соопшти дека испратила инспектори во Саратов за да ја потврдат автентичноста на снимката. Портпаролот на Кремљ, Дмитриј Песков, изјави дека ќе биде потребна „сериозна постапка“ доколку се потврди „автентичноста“ на снимките.