По 16 години пауза британското денс-дуо Лефтфилд ќе го објави својот трет по ред албум насловен како Alternative Light Source. Оваа група беше мошне влијателна на музичката сцена во втората половина од деведесетите години од минатиот век кога во 1995 година прво го издадоа одличниот деби албум Leftism кој го содржеше хитот Original, за четири години подоцна да го издадат еден од најзначајните албуми за модерната денс-музика Rhythm and Stealth.
Првиот сингл од новиот албум се вика Universal Everything и можете да го чуете на официјалниот Соудклауд акаунт на Лефтфилд, додека албумот се очекува да излезе на почетокот од летово, поточно на 8 јуни.
Уште една легендарна британска електро-денс група годинава се враќа со албум. Продиџи на крајот од месецов ќе го издаде својот шести по ред албум The Day Is My Enemy. На ова ново издание нивната публика чекаше скоро шест години откако во 2009 година групата го издаде албумот Invadors Must Die.
Официјалното издание на новиот албум се очекува на 30 март годинава, додека на интернет веќе се појавија пиратските верзии на The Day Is My Enemy.