Чешката влада на чело со економистот Јиржи Руснок поднесе оставка откако минатата недела ѝ беше изгласана недоверба во парламентот, по само еден месец на власт.
Главните парламентарни партии се во судир со претседателот Милош Земан, откако во јуни, спротивни на нивните желби, го именуваше својот долгогодишен соработник, економистот Јири Руснок, за мандатар на новата влада, откако претходниот премиер Петр Нечас поднесе оставка по избувнувањето на аферата за подмитување и прислушување во чиј центар беше шефицата на неговиот кабинет и негова љубовница, во кој беа вмешани и парламентарци и високи функционери на разузнавањето.
Партиите го обвинуваат Земан, левичар кој победи на почетокот од 2013 година на првите непосредни претседателски избори во Чешка, дека со именувањето на својот поранешен советник ги заобиколува уставните одредби и си ги зголемува своите овластувања.
Како што се очекува, парламентот на Чешката Република на 16-ти август ќе започне разговори за самораспуштање на Домот на пратениците. Доколку пратениците гласаат за предвремени парламентарни избори, според уставот, шефот на државата ќе го распушти Домот на пратениците.
Според уставот, исто така, претседателот по распуштањето на парламентот го одредува датумот за предвремени избори. Чешките политички аналитичари сметаат дека предвремените избори би можеле да се одржат уште кон крајот на октомври годинава. Во тој, новиот парламент може да го одобри буџетот за 2014 година.