Британскиот весник Гардијан од Врховниот суд побара судски налог за заштита на материјалите кои му беа одземени на партнерот на новинарот Глен Гринвалд. Адвокатите на Бразилецот Дејвид Миранда изјавија дека материјалите кои му се одземени на Миранда во текот на неговото деветчасовно испитување содржат доверливи информации.
Европската комисија изрази загриженост истакнувајќи дека се работи за напад на слободата на медиумите. Новинарите во Лондон се под притисок што ја обелоденија аферата за шпионирање. Новинарските здруженија се загрижени за слободата на печатот пишува Дојче Веле.
Притисок и заплашување се извршени врз Глен Гринвалд, новинарот кој контактираше со Сноуден и пишуваше извештаи за Гардијан, како и врз неговиот партнер Дејвид Миранда.
Организацијата „Репортери без граници“ инцидентот во Лондон го оцени како шиканирање и напад на истражувачкото новинарство. САД и Велика Британија се обидуваат да ја уништат мрежата која стои зад новинарското обелоденување на шпионската програма на двете земји, истакна Михаел Редиске од организацијата.
-Загрижувачки е фактот што тајната служба го принуди главниот уредник на најреномираниот весник во Велика Британија да го уништи информативниот материјал. Но, неразбирливо е притоа зошто уредникот потклекнал на притисоците, без да се обрати до судовите и веднаш да излезе во јавноста вели Редиске.
И Здружението на германските новинари ДЈФ, исто така го критикуваше однесувањето на властите кон Гардијан како напад врз слободата на печатот.
-Во Германија ова не е можно. Германските закони исклучуваат можност агенти на тајна служба да се појават во некоја редакција и да надгледуваат уништување на информации, рече портпаролот Хендрик Цернер за Дојчланд функ.
Гардијан е еден од најугледните британски весници. Леволибералниот весник го оправда овој епитет во аферата околу американската тајна служба НСА и британската ГЦХКУ. Весникот известуваше за активностите на двете тајни служби кои очигледно ги шпионирале телекомуникациските врски на граѓаните. Информациите на Гардијан му ги обезбеди екс-соработникот на НСА, Едвард Сноуден.