Државниот врв по состанокот кај Иванов, за случајот со Гошинце, констатираше дека надлежните институции ги преземаат сите неопходни мерки и активности за расветлување на случајот во Гошинце.
Од Кабинетот на Иванов велат, властите работат на пронаоѓање на сторителите и нивно санкционирање.
„На состанокот беа разменети првичните информации за нападот на караулата Гошинце, при што државниот врв го осуди инцидентот на северната граница на Република Македонија. Воедно, државниот врв повикува на одговорно однесување на сите општествени фактори и да не се злоупотребува настанот во какви било цели“, соопшти Кабинетот на шефот на државата.
Покрај македонскиот претседател, на состанокот присуствуваа претседателот на Собранието, премиерот, министрите за внатрешни работи и за одбрана, началникот на Генералштабот на АРМ, директорот на Управата за безбедност и контраразузнавање, директорот на Агенцијата за разузнавање и раководителот на Службата за воена безбедност и разузнавање при МО на РМ.