Првиот човек на партијата Достоинство, Стојанче Ангелов преку својот фејсбук-профил повикува на собир пред Македонската радио-телевизија денеска во 12 часот по повод вчерашниот упад на обезбедувањето на МРТ во емисија на Канал 103, откако радиото сместено во зградата на јавниот сервис го покани генералот како гостин на нивната програма.
– Дојдете денеска во 12.00 часот пред МРТВ! Дојдете за заедно да ја оослободиме од стегите на режимот! За доброто на сите македонски граѓани, напиша Ангелов на Фејсбук.
Обезбедувањето на зградата на Македонската радиотелевизија (МРТ) вчера вечерта упадна во емисија на независното музичко радио Канал 103, кое емитува програма од овој објект, и го легитимираше водителот. Оваа реакција на обезбедувањето следува по новиот обид на генералот Стојанче Ангелов да влезе во зградата на јавниот сервис и да ги презентира снимките од телефонските разговори коишто ги објави опозицијата.
Лицата од обезбедувањето не му дозволија да биде гостин ниту во програмата на Канал 103, а упадот се случил нешто подоцна во ноќта.
– Додека бев во објектот на МРТ се сретнав со двајца водители од култниот Канал 103 или парчето светлина во мрачните лавиринти на Македонската радиотелевизија. Водителите ми предложија да отидеме во студио и да гостувам во нивната емисија. Прифатив без да му ја мислам и тргнав по нив. Тогаш ни пријде човек од обезедувањето и ни објасни дека јас не смеам да влезам внатре. Ми падна жал за човекот. Возрасен маж, со мустаќи, пред пензија. Не сакам да му ги загорчувам последните работни денови. Тој е најмалку виновен што му дале таква наредба. Има време, ќе гостувам друг пат, напиша Ангелов вчера на својот фејсбук-профил.
Самостојниот синдикат на новинари и медиумски работници (ССНМ) утрово реагираше дека е запрепастен и згрозен од упадот во програмата и легитимирањето на водителот на емисијата на Канал 103 во МРТВ.
Аудио-снимка од упадот во Канал 103: