Како што соопштуваат од Охридската архиеписопија „повторно е одложено, политички мотивираното судското рочиште против Архиепископот охридски г.г. Јован, останатите Епископи, монаштво и верници на Православната Охридска Архиепископија“.
Еве го соопштението на ПОА:
Последното судско рочиште од овој процес се има одржано на 11 Декември, минатата година, а од тогаш наваму, пет месеци по ред, заради вршење притисок врз Архиепископот охридски г.г. Јован и Православната Охридска Архиепископија, судските рочишта биваат одложувани.
При вчерашното јавување пред судот, беше констатирано дека здравствената состојба на Архиепископот Јован е сериозно влошена и дека веќе еден месец постои мислење од лекар специјалист дека тој треба да биде опериран. Беше констатирано и дека мислењето на лекарот специјалист е одобрено од судот, но истражниот затвор кадешто Архиепископот Јован се наоѓа во притвор, 23 часа затворен во келија, веќе цел месец не му ја овозможува основната здравствена заштита.
Очигледно крајната цел на притисоците кои ги врши непризнатата МПЦ и нејзиниот расколнички архиепископ е целосното уништување на Архиепископот охридски Јован и Православната Охридска Архиепископија. Притисоците се состојат во следново: непризнатата, владино спонзорирана МПЦ и нејзиниот расколнички архиепископ се единствената причина за сите тужби, монтирани судски процеси и затворања на Архиепископот охридски Јован во изминативе десет години, а во поново време нивните побарувања се прошируваат кон целата Православна Охридска Архиепископија.
Во меѓувреме властите се соочуваат со меѓународни извештаи за загрозување на основните човекови слободи во Р. Македонија, изразени токму преку селективниот полициско – судски прогон.