Денес заврши најновиот, политички монтиран судски процес против Архиепископот охридски г.г. Јован, Епископот брегалнички г. Марко, Епископот стобиски г. Давид, јеромонаси, игумании, монахињи и верници на Православната Охридска Архиепископија, се вели во соопштенито од ПОА.
Интегрален текст од соопштението на ПОА:
Судијата г. Ивица Стефановски ја соопшти пресудата која гласи: сите обвинети се виновни! На Архиепископот охридски г.г. Јован судот му изрече три години затворска казна, а на останатите обвинети судот им изрече условна казна од две години затвор, која ќе се активира доколку го повторат делото во следните пет години! Судот уште пресуди да биде конфискуван и имот на Православната Охридска Архиепископија!
Веќе е пословичен фактот дека, години наназад, во сите меѓународни извештаи македонското судство бива наведено како еден од најпроблематичните сегменти на нашето општество, токму според подложноста на корупција и на политички влијанија.
Овој политички монтиран судски процес стана доказ за горепосочените меѓународни извештаи за Р. Македонија. Ваквите монтирани судски процеси докажуваат дека судовите служат за политичка пресметка, со што уште еднаш се потврдува ставот за државната спонзорираност и штитење на монополот на расколничката Македонска православна црква и истовремено газењето на верските слободи и прогонот врз верска основа на Православната Охридска Архиепископија.
Изречената пресуда е седма затворска пресуда за Архиепископот Јован, којшто веќе подолго време е политички затвореник во Р. Македонија!
Конечно, со ваквата пресуда и расколничката Македонска православна црква ги губи шансите за решавање на проблемот со расколот во којшто пребива, притоа зацврстувајќи му ја на православниот свет претставата за себе како за верска организација, која е творба на еден минат систем и која активно учествува во прогонот на канонската Православна Охридска Архиепископија во Р. Македонија!
Во однос на медиумските набедувања, ја информираме јавноста дека, само суеверните или неупатените во верата, можат да ги разберат условните реченици како клетви! Православната Охридска Архиепископија никогаш на никого не фрлила клетва, иако такви примери имало во историјата на Црквата.
Во продолжение, за илустрација, ќе наведеме еден таков пример: светиот Василиј Острошки купил земја за Црквата, а потоа за таа земја бил неправедно обвинуван, и истиот тој имот му бил конфискувана од локалниот кнез. Кога светиот Василиј Осторшки му се пожалил на Патријархот Максим, Патријархот му испратил на кнезот писмо со следнава содржина: „…и доколку некој од вас христијаните се обиде да изврши одземање на таа земја од манастирот наречен Острог, на таквиот разорител, Господ нека му ги одземе и неговиот дом, и него, и неговите синови, и неговата стока и сиот негов имот Господ нека му го уништи одненадеж, и неговата трага и корен да погинат за навек. Амин.“ На упатените во верата им е познат понатамошниот тек на настаните!
Кога престануваат да функционираат правните закони, тогаш на сила стапуваат духовните закони! Сите во Православната Охридска Архиепископија се молат споменатите духовни закони да не зафатат никого, та да преовладее разумот, за доброто на сите граѓани, за доброто на Р. Македонија.