По кратко боледување на 82 години вчера во Скопје почина еминентниот Професор Тодор Џунов, кој од 1985 до 1988 година беше ректор на Универзитетот „Св. Кирил и Методиј“ во Скопје, добитник на ценети признанија и автор на исклучително значајни книги од правните науки.
Универзитетот Св. Кирил и Методиј соопшти дека погребот ќе биде извршен утре, 3 јануари 2014, во 12.30 часот на Градските гробишта Бутел во Скопје.
Проф. Џунов имаше објавено повеќе од 120 научни и стручни трудови од областа на меѓународното јавно и приватно право и меѓународните односи, како и од имотното право и за односи и проблеми во научните дејности и во високото образование.
Добитник беше на наградата „11 Октомври“ за монографијата „Меѓународното регулирање на користењето на водите“, Медал на Универзитетот во Хале (Германија) и на Софискиот универзитет.
Проф. Џунов беше роден во 1931 во кавадаречкото село Ваташа. Во 1954 година дипломирал на Правниот факултет во Скопје, каде што од 1974 бил редовен професор и декан од 1981 до 1983. Во 1994 станал судија, а во 2000 година претседател на Уставниот суд на Република Македонија.