По долга борба со ракот на дојка, во 68 година од животот почина Марина Туцаковиќ.Нејзината состојба дополнително се влошила во изминатите денови поради зараза со коронавирусот, јавуваат српските медиуми.Таа последните денови ги поминала во клиничкиот центар „Драгиша Мишовиќ“ каде од 14-ти месецов била ставена на респиратор.
Таа својот потпис го стави на илјадници стихови кои преточени во музика прераснаа во врвни хитови од рок, поп и фолк жанровите во времето на екс југославија до денес.
Кариерата на музички текстописец,Марина Туцаковиќ ја почнала во осумдесетите години од минатиот век, најнапред преку соработка со групата „Зана“. Оттогаш, нејзините текстови направија многу музички ѕвезди од тогашните пејачи присутни на естрадата, меѓу кои Здравко Чолиќ, Лепа Брена, Цеца, Северина, Оливер Мандиќ, Харис Џиновиќ, Жељко Самарџиќ, како и Неда Украден.
Туцаковиќ соработуваше и со македонската музичка ѕвезда Тоше Проески , конкретно на албумот „ Ако ме погледнеш во очи“ од 2002 година.
Нејзината последна желба била да биде закопана покрај гробот на нејзиниот син Милош кој почина ненадејно во 2008 година, а не во алеата на великаните.
Нејзините пријатели зборуваа дека таа болка Туцаковиќ никогаш не можела да ја надмине.
Нејзина последна објава на Твитер е реченицата: Луѓето се такви, ќе го земат она што не им треба, само за вие да го немате она што ви треба“.
.