Иво Лауренчиќ, претседател и креативен директор на рекламната агенција „Идеја плус“ денеска почина по долго и тешко боледување.
Роден е во Шибеник, завршил Филмска академија во Белград, бил директор на Втората програма на РТВ Белград, работел на многу проекти, градејќи кариера како слободен филмски уметник. Снимал документарци, бил помошник-режисер на „Венецот на Петрија“, „Мајстори, мајстори“, „Сивиот дом“, „Грлом у Јагоде“…
Во Македонија дошол пред 20 години на покана на тогашниот директор на „Пивара Скопје“, Светозар Јаневски и тука ја развил маркетинг-агенцијата „Идеја плус“, по урнекот на „Идеја плус“ од Белград, која стана школа за маркетинг во Македонија.
Лауренчиќ го осмисли и реализира серијалот од 1.060 емисии „Говорете македонски“ за Македонската телевизија. Беше и креатор и реализатор на кампањата за промоција и зачувување на македонското кирилично писмо „Додека пишувам на кирилица постојам“ која доби прва награда на фестивалот ФЕСТО во Хрватска.
Неговите соработници го опишуваат како бескомпромисен перфекционист, одличен и искрен пријател.
Комеморативната седница ќе се одржи во среда, 15 мај, во Едукативниот центар М6 во Скопје, а ќе биде погребан истиот ден во 13 часот на градските гробишта Бутел.