Почина уште една, 14-та жртва во масовното убиство кое во раните утрински часови го изврши Љубиша Богдановиќ (60) во селото Велика Иванча, кое се наоѓа меѓу градовите Младеновац и Топола во Србија.
Како што изјави РТС, станува збор за седумдесетгодишната сопруга на убиецот Богдановиќ, која беше тешко повредена во масакрот ова утро. Богдановиќ на самото место уби 12 луѓе, додека уште еден почина на пат кон болница.
Директорот на српската полиција Милорад Вељовиќ во директен преност на српската национална телевизија соопшти дека полицијата се уште го нема утврдено мотивот за убиството кое Богдановиќ го извршил со пиштол CZ 88.
“Се што знаеме е дека лицето учествувало во 1991. година во воени дејствија во Славонија “, рече Вељовиќ, додавајќи дека осомничениот за убиството немал медицинско досие, но истакна дека сите овие податоци полицијата се уште ги проверува.
Вељовиќ потврди дека сите жртви живееле во близина, биле во сродство или соседи со убиецот и сите биле убиени додека спиеле.
Лекарите од белградскиот Ургентен центар соопштуваат дека за живот се борат уште две лица кои се сериозно повредени во масакрот во Иванча.
Според официјалните податоци Богдановиќ пукал во себе кога ја видел полицијата пред својата куќа. Може да го погледнете видеото од местото каде беше извршен масакрот.