Српскиот полицаец, кој беше ранет во пределот на главата утрово во три часот во престрелка на граничниот премин Мердаре, меѓу Србија и Косово, почина во Военомедицинската болница во Белград, јавија српските медиуми.
Министерот за внатрешни работи на Србија, Небојша Стефановиќ нареди во регионот да бидат испратени зајакнати полициски единици, кои ќе го заштитат животот на полицајците и локалните жители, како и интересите на Србите.
– Србија нема да ги толерира терористичките напади на своја територија и полицијата најостро ќе одговори на секој напад, изјави тој.
Министерот изрази сочувство до семејството на починатиот 30-годишен полицаец, кој беше погоден во пределот од главата од истрел, кој дошол од косовската страна.
Во престрелката синоќа покрај преминот Мердаре е убиен и еден Албанец.
Престрелката започнала синоќа, кога пограничната полиција забележала Албанци, кои незаконски сечеле дрва во шумата покрај Куршумлија. Албанците отвориле оган од автомаско оружје кон полицајците.