По долго боледување денеска почина профeсор доктор Стојмен Михајловски, кој беше уставен судија во периодот од 1994 година до 2003 година.
Роден е во 1941 година во село Трново, Кривопаланечко. Дипломирал на Правниот факултет во Скопје во 1965 година, магистрирал во Институтот за социолошки и политичко правни истражувања во Скопје во 1973 година, докторирал на Факултетот за политички науки на Универзитетот во Сараево во 1979 година на тема „Ефикасноста на политичкото одлучување”.
Професор Михајловски беше уставен судија во периодот од 1994 до 2003 година. Во периодот од 1966 година до 1994 година беше научен советник и редовен професор на Институтот за политичко-правни истражувања во Скопје, а во два и пол мандата беше и директор на Институтот. Како редовен професор ги предаваше предметите уставно право и политички систем на постдипломските студии при Институтот за социолошки и политичко-правни истражувања, на Факултетот за безбедност, на Воената академија и на Факултетот за општествени науки во Скопје.
Учествувал и раководел со повеќе национални и меѓународни научно-истражувачки проекти од областа на правните и политичките науки. Автор е на голем број самостојни научни трудови од областа на избирачкото право и политичкиот систем, а објавил и повеќе од 100 статии и други прилози во домашни и странски научни и стручни списанија