Родилката од Охрид која синоќа беше донесена на ГАК, немала коронавирус-негативен е резултатот од тестот кој и бил направен посмртно. Резултатот од тестот за новороденчето на родилката од Куманово која е заболена од КОВИД-19 ќе биде готов во текот на утрешниот ден, потврдија за НОВА, на Клиниката за гинекологија и акушерство.
Почината 37 годишната родилка од Охрид на Клиниката за гинекологија беше донесена со мртов плод во утробата, со возило на брза помош, со висока температура и оставена пред вратата на клиниката, за што ДСЗИ ќе изврши вонреден надзор.
Родилката била комплициран случај со прекумерна тежина и бременост која не била следена. Лекарите оперативно го извадија плодот, а од стомакот на мајката е евакуиран гној. Од ГАК, уште веднаш наведоа дека можна причина за фебрилноста е септичната состојба на пациентката, но тестот требаше да утврди или отфли присуство на коронавирус.
Мажот на возраст од 66 години, кој на 30.03 од страна на МВР при извршување на рутинска контола на лице во домашна изолација, беше пронајден починат во својот стан во Битола е негативен на коронавирусот. Брисот беше земен истиот ден од страна на Центарот за јавно здравје во Битола и испратен во Скопје на анализа. Починатиот, по враќање од Англија бил во 14 дневна изолација, а истата требала да заврши на 30 март. Од познати хронични болести, имал дијабет и хипертензија.