Никој од гинеколозите во поликлиниката Букурешт, каде што и била водена бременоста на 26 годишната родилка која почина пред два дена, не знае кој од тројцата лекари и бил матичен гинеколог. Затоа и не добивме објаснување како можеле да не забележат дека нешто се случува со младата жена, која и три дена пред смртта се жалела на тешкотии во дишењето. Во поликлиниката воопшто не беа информирани воопшто дека нивна пациентка починала.
Таа денес беше погребана во нејзиното родно Враништа. Семејството е во шок. Не можеа многу да зборуваат. Нејзината сестра за НОВА кратко изјави дека таа им јавила дека сака да и ја следат бременоста во болницата во Чаир, но се предомислила и за матичен одбрала гинеколог во поликлиниката Букурешт. Пред три дена и се слошило, тешко дишела, но по примената инфузија била пуштена дома. Каде се случувало тоа, семејството со сигурност не може да кажат. Нејзиниот сопруг денес по погребот не беше во состојба да зборува.
Лекарите се сомневаат напредната фаза на малигно заболување на белите дробови или анеуризма, а неофицијално и првичните анализи од обдукцијата наведуваат на карцином.
Младата жена почина пред два дена во Градската хуруршка болница „Св. Наум Охридски“, откако била донесена веднаш по породувањето со царски рез во Специјалната болница за гинекологија во Чаир.
Според директорот Башким Исмаили во болницата дошла во понеделникот во 9 и 30 часот изутрината во тешка состојба со отежнато дишење, помодрени усни по што веднаш била качена на интензивна нега каде што била реанимирана и и бил даден кислород. Но, состојбата станувала се подраматична, родилката почнала да запаѓа во кома. По еден час реанимација, докторите одлучиле да ја породат, за да го спасат бебето.
„ Младата жена дојде одненадеж и побара помош. Беше околу 35 та недела во бременост, што значи осми, деветти месец. Не ја познаваме, бременоста не е следена тука. Ние веднаш почнавме да ја анимираме, но состојбата стануваше критична. Во тој момент размислувавме и за бебето, затоа одлучивме да направиме царски рез барем него да го спасиме, бидејќи се губеа тоновите и кај бебето“, изјави за НОВА,Башким Исмаили директор на Специјалната болница за гинекологија и акушерство во Чаир.
Кога виделе дека не можат да ја реанимираат, односно состојбата станувала се по критична со возило на Итна медицинска помош, со двајца анестезиолози и гинеколог во придружба, родилката околу пладне била пренесена во Градската хуруршка болница „Св. Наум Охридски“.
„Направивме се што е во наша можност, дури повеќе од тоа. Тука се случуваше вистинска драма, цела болница помагаше, сите беа на нозе“, рече Исмаили.
НОВА, од лекарски извори во Градската хируршка болница дознава , дека младата родилка била донесена во 12 и 30 часот со раширени зеници, во многу тешка состојба. Лекарите дури не успеале да ги направат сите потребни испитувања, се обидувале да ја спасат, но едното белодробно крило воопшто не и функционирало. Таа починала во 17 и 30, а телото веднаш било предадено на обдукција. Бебето е живо и е сместено во инкубатор на Клиниката за детски болести.
Лекарите не сакаат да шпекулираат што довело до компликации кај родилката, се додека не биде готов наодот од обдукција. Неофицијално, се претпоставува дека станува збор за некој напреден малигнен процес или емболија на белите дробови.
Од Министерството за здравство се уште не се изјасниле за случајот.