фото: МОФ
Претставници од студентскиот и професорскиот пленум, министерот за образование Абдулаќим Адеми, неговиот заменик Спиро Ристовски , вицепремиерот Зоран Ставрески и ректорот на УКИМ Велимир Стојковски, штотуку ја започнаа втората работна средба за нов закон за високо образование во просториите на ректоратот на УКИМ, јавува репортерот на НОВА Дехран Муратов.
Во работната група е и нелегитимниот претседател на Студентскиот парламент, Кирил Спироски чиј мандат истече уште во октомври минатата година.
На средбата треба да се допрецизираат модалитетите за работа на работната група која ќе работи на нов закон за високо образование.
Од претходната средба, студентите велат дека се чувствува позитивна атмосфера за соработка. Тие ќе бидат дел од работната група која во текот на наредните 30 дена ќе анализира и посочува што точно е потребно за квалитетно високо образование.
-Првата средба не беше од одлучувачки карактер. Ние баравме интегрално нов текст на законот за високо образование. Аргументите беа изнесени за тоа и средбата заврши со договор да имаме следна средба, потенцирам не беше ништо одлучено. Секоја од четирите преговарачки страни требаше да се исконсултира со својата база за да се дојде на следна средба со заклучоци, изјави Ивана Туфегџиќ, член на Студентскиот пленум.