Во Основниот суд во Велес на обвинителна клупа утре ќе седне Тони Станоев, обвинет за трикратно убиство во Кавадарци, од ноември 2014 година, кога ги застрела родителите на неговата сопруга и нејзината сестра.
На Станоев ќе му се суди за три кривични дела „убиство“ за кои му се заканува казна затвор од најмалку 10 години до доживотен затвор, за убиството на Снежана, Билјана и Илија Л.
Според обвинението што беше поднесено на почетокот на мај, од страна на јавниот обвинител во Велес, Станоев ќе одговара за тројното убиство кое го извршил на 09.11.2014 година околу 16.00 часот во куќата на родителите на неговата поранешна сопруга.
Истрагата утврдила дека тој отишол во куќата на родителите на екс сопругата, да разговара со неа, но таа во тој момент била на работа во Основниот суд во Кавадарци, а дома била нејзината сестра и родителите.
Почнале да се расправат меѓу себе, а по меѓусебното туркање и влечење, на Станоев му паднал пиштолот со кој пукал во мајката и сестрата на неговата поранешна сопруга.
Откако пукал во нив, се качил на катот од куќата и испукал еден куршум во таткото на неговата поранешна сопруга.
Родителите починале веднаш, а сестрата со тешки повреди била пренесена во болница каде што починала.
Тони Станоев по убиството избега а беше фатен 2-3 дена подоцна во близина на гробиштата во Кавадарци.
Од тогаш е во притвор, а врз него било извршено и психијатриско вештачење кое утврдило пресметливост и истото ќе се користи како доказ во постапката.
Во текот на истрагата утврдено е дека сега обвинетио повеќе пати бил пријавуван за упатување закани кон свои блиски и кон блиските на неговата сопруга, како и дека бил извршител на семејно насилство кон сопругата.
Од апсењето Станоев е во притвор, од каде што треба да биде донесен и на утрешното судење во велешкиот суд.
Во меѓувреме, по спроведена постапка, пред судовите во Велес и Кавадарци беа осудени на услови и парични казни полицајци од полициската станица во Кавадарци и тим од Центарот за социјални работи во Кавадарци, кои не презеле мерки по пријавите за семејно насилство и не му го одзеле оружјето со кое подоцна беше извршено убиството.