На 25ти мај, 2020, белиот полицаец Дерек Шовин од Минеаполис, Минесота (САД), го уби афро-американецот Џорџ Флојд клечејќи на неговиот врат 9 минути и 29 секунди додека Флојд беше притиснат на земјата. Скоро една година подоцна почна кривично судење против Шовин кој е обвинет за убиство од втор степен.
Убиството на Флојд кое беше снимено од страна на случаен минувач беше клучно за вниманието кое го доби овој случај на полициска бруталност: ова крајно вознемирувачко видео го предизвика бранот на анти-расистички #BlackLivesMatter протести во САД и на глобално ниво. Преку масовните протести, #BlackLivesMatter активистите посочија кон системскиот расизам на американската полиција, американскиот судски ситем, како и ред други проблеми поврзани со расизмот и полициската бруталност врз различни малцинства.
На денот на убиството, полицијата била викната бидејќи Флојд наводно пробал да плати во продавницата Cup Foods со фалсификувана банкнота од само 20 долари по што дошле Дерек Шовин и уште тројца полицајци – нешто што многумина го сметаат веќе за диспропорционална реакција на полицијата. Тројцата полицајци кои биле присутни за време на убиството на Флојд се моментално обвинети за помагање на убиство од втор степен и чекаат посебно кривично судење за нив.
Претходната недела обвинителството го покажа убиството на Флојд од различни агли преку повеќе видеа кои се користат како доказ против Шовин. Обвинителството исто така повика повеќе различни сведоци кои биле присутни за време на убиството за да покаже каква траума овој настан им создал на тие што го виделе. На пример, Дарнела Фрејзер, која била случаен минувач, раскажува низ солзи за како слушнала дека Флојд кажал дека не може да дише и вели дека „тој плачеше по мајка му, тој чувствуваше голема болка. Изгледаше како да знаеше дека ќе умре“. Братучедката на Фрејзер, која имала само 9 години кога се случил инцидентот, исто така го видела убиството и даде исказ за судењето.
Тимот во одбраната на Шовин, пак, тврди дека „се работи за повеќе од 9 минути и 29 секунди“. Одбраната тврди дека коленото на Шовин не било баш врз вратот на Флојд и дека смртта на Флојд можеби била предизвиканата од дрога. Обвинителство тврди дека без разлика што Флојд имал зависен на опиоиди, тој не би можел да умре од предозирање во оваа ситуација.
„Верувајте им на вашите очи, дека тоа е убиство,“ кажи обвинителот Џери Блеквел, обраќајќи се на поротата.
„Додека одбраната пробува да создаде слика за Џорџ како некаков полуден човек кој користел дрога, тој не изгледа така. Тој изгледа како нормален човек кој, како многу од нас, му е страв од полицијата. Како да не ти е страв? Овие полицајци убија луѓе – полицијата има убиено илјадници луѓе, и тоа не само афро-американци,“ кажа уредникот за најстариот весник во сопственост на афро-американци во Минесота, Мел Ривс за Democracy Now! „Тоа е политичко. На системот на полициско работење му се суди.“
Ова историско судење продолжува следна недела и се очекува да трае уште неколку седмици.
Елена Гаговска