Бугарската полиција го приведе поранешниот премиер на Бугарија и лидер на ГЕРБ, Бојко Борисов. Информацијата ја пренесуваат бугарските медиуми.
Според новинарските извештаи, полицијата влегла и во домовите на други високи поранешни функционери. Објаснувањето од полицијата било „итна проверка“. Контроли се вршеле и во домовите на претставниците на големиот бизнис.
Информацијата, според извештаите, ја потврдиле и високи извори од новата влада, објави 24 часа. Во тек е голема операција низ државата, која е заедничка со Европското јавно обвинителство. Се проверуваат 120 досиеја, изјавил извор од кабинетот за медиумот.
Бугарските медиуми јавија дека се приведени Бојко Борисов, поранешниот министер за финансии Владислав Горанов и поранешната шефица на буџетската комисија Менда Стојанова.
Министерството за внатрешни работи, кое го најави неговото апсење, ја избриша веста од сопствената веб-страница, јавуваат тамошните гласила.
„Борисов не е приведен но во моментов се претресува неговиот дом“, ова го изјави Никола Николов од ГЕРБ.
Што се однесува до другите членови на ГЕРБ кои наводно се приведени, Николов рече дека оваа информација не е точна.
„Никој не е над законот“ напиша премиерот на таа држава, Кирил Петков на фејсбук како коментар на информацијата за апсењето на поранешниот премиер Бојко Борисов.
Според бугарските медиуми, акцијата е за 120 случаи на злоупотреба на средства од ЕУ.
„Никој не е над законот!“, напиша премиерот Кирил Петков на својот Фејсбук профил.
Портпаролката на Кабинетот на Петков Лена Бориславова ја потврди веста за актуелната акција.
Статусот на премиерот на Фејсбук ја изразува позицијата што ја има од првиот ден на неговото владеење“, рече Бориславова.
Лидерот на ГЕРБ, Бојко Борисов вечерва во полициски автомобил го напушти својот дом во градот Банкаја, јави дописникот на МИА од Софија.
Тој беше изваден од полицаец и ќе биде предаден на Националната полициска служба на Бугарија.
Сите пратеници на ГЕРБ, поранешни министри и поддржувачи се собраа пред куќата на Борисов и се упатија кон местото каде што ќе биде испорачан поранешниот премиер на Бугарија.
Вицепремиерот на ГЕРБ Тома Биков ги повика симпатизерите на нивната партија да дојдат на протест во Софија.