Сите директори на јавниот телевизиски сервис ТВП во Полска поднесоа оставка како протест поради измените на законот кој ќе сериозно ќе ја редуцира слободата на информирање а националното радио протестира со емитување на химната и Одата на радоста на Бетовен, симбол на европската заедница, јавува регионалната телевизија Н1.
Како што НОВА јави на 31 декември, Полска на 30 декември усвои закон со кој министерот за финансии на Полска ќе биде човекот кој ќе ги именува уредниците и директорите на полските медиуми.
Новите одредби на законот предвидуваат дека мандатите на членовите на дирекциите и советите за мониторинг на националниот радио и телевизиски сервис веднаш се прекинуваат. Отсега министерот за финасии ќе ги именува и отповикува овие членови. Досега тие беа избирани на конкурс кој го организираше Националниот аудио-визуелен совет.
Европската радио-телевиски унија (УЕР-ЕБУ), Репортерите без граници и Здружението на европските новинари изразија голема загриженост поради овој развој на настаните во Полска. За нив овој закон е воведен без дебата, без консултации и во голема брзина.
Владеачката партија Право и правда на Јарослав Качински, која дојде на власт на 25 октомври, успеа да го протне законот токму пред Нова година за време на ноќна седница.
Според законот, првите луѓе на јавните полски медиуми и членовите на Советот нема повеќе да бидат бирани на конкурс и за одреден период туку министерот ќе може да ги смени по своја волја бидејќи во измените на законот се укинати и прецизните услови според кои директорите можат да бидат менувани.
Телевизијата Н1 ја пренесува изјавата на полското радио за емитување на химната:
“Со полската химна и Одата на радоста на секој саат сакаме нашите слушатели и јавноста да обрнат внимание на заканите за плурализмот и слободата на говорот во новиот закон за медиуми”.
Претставникот на премиерката Беата Шидло за реформа на медиумите која им дава мисија да шират патриотизам дома и историската вистина за Полска во странство Криштоф Чабањски ги одби меѓународните протести против законот:
“Овој политички механизам се спроведува кон јавните медиуми во Полска а беше маскиран со наместени конкурси”, рече тој и додаде дека кандидатите на партијата Право и правда, додека биле во опозиција, никогаш не успеале да добијат место преку јавен конкурс за шефовски места во полските медиуми.
Шефот на пратеничкиот клуб на партијата Право и правда Ришард Терлецки побара од јавните медиуми да прекинат со критикување на реформите и промени што ги внесува партијата на власт.