Тони Јакимовски, шеф на кабинет на поранешниот директор на УБК, Сашо Мијалков, е назначен за генерален директор на Југо-источниот европски центар за спроведување на законот ( SELEC). Тој е еден од осомничените од страна на СЈО во случајот „Тврдина“, како и еден од помилуваните од претседателот Ѓорѓе Иванов.
Еден од осомничените во случајот „Тврдина“, Тони Јакимовски, шеф на кабинет на поранешниот директор на УБК, Сашо Мијалков, доби унапредување во кариерата. Тој стана генерален директор на Југоисточниот европски центар за спроведување на законот ( SELEC), меѓународно тело за борба со криминалот, вклучувајќи организиран криминал во Југоисточна Европа.
Јакимовски е еден од 56-те помилувани лица кои се најдоа на листата за сега повлечената, колективна аболиција на претседателот Ѓорѓе Иванов.
Според биографијата на Јакимовски, достапна на веб сајтот на оваа меѓународна мрежа, тој од 2014-та до 2016-та година работел како Национален координатор за борба против тероризмот, минатата година бил помошник директор за координација во МВР и УБК, додека од 2006-та до 2015-та е раководител на Сектор за координација во МВР и УБК.
Во мрежата СЕЛЕК членуваат Албанија, Босна и Херцеговина, Бугарија, Хрватска, Македонија, Грција, Унгарија, Молдавија, Црна Гора, Романија, Србија и Турција. Ова тело координира регионални операции и поддржува истраги за превенирање на криминал во меѓународен криминал.
Седиштето на меѓународната мрежа за борба со организиран криминал е во Букурешт, Романија, што најверојатно за новиот генерален директор ќе значи дека треба да се пресели во оваа земја.
На новата позиција, според информациите објавени на веб сајтот на СЕЛЕК, Јакимовски бил избран на 30 јуни во Букурешт, на состанокот кој бил фокусиран на изборот за нов генерален директор.
За отворената позиција аплицирале Македонија, Албанија и Србија.
„Гласачкиот процес заврши успешно со изборот на Тони Јакимовски, кандидатот на Македонија, како генерален директор на СЕЛЕК, по што Јакимовски ќе ја преземе позицијата по истекот на мандатот на сегашниот директор, Гурбуз Бахадир“, се вели во соопштението на организацијата.
НОВА испрати прашања во МВР за тоа на чиј предлог е назначен Јакимовски на оваа позиција, како и дали Јакимовски сега е дел од УБК или пак неговата функција престанува по изборот на новото работно место, но до објавата на текстот не добивме одговори.
Од Специјалното обвинителство за НОВА велат дека со оглед на последната одлука на Кривичниот совет да ја одбие нивната жалба за три лица во случајот „Тврдина“, сега осомничените може и да ја напуштат државата, бидејќи нивните пасоши не се одземени, ниту пак се определени други мерки на претпазливост.
Кривичниот совет на Основниот суд Скопје 1 вчера го потврди решението на судијата на претходна постапка да не им одреди мерки на претпазливост на тројца од осомничените во случајот „Тврдина“.
Петте осомничени во „Тврдина“, меѓу кои и поранешната министерка за внатрешни работи, се товарат дека минатата година ја искористиле својата службена положба за да ја уништат опремата од нелегалното прислушување, вредна 10 милиони евра.