Mинистерството за транспорт и врски го поништи тендерот на кој за 71 денар за метар квадратен беше продадено земјиште спроти НБРМ, кај „Џамбо Веро“ во Скопје, бидејќи во меѓувреме, три лица се пријавиле дека поседуваат дел од земјиштето.
– Во текот на вчерашниот ден, до Министерството за транспорт и врски се обратија странки, односно физички лица до кои допрела информацијата за отуѓувањето на ова земјиште и истите понудија докази дека дел од земјиштето е во нивна сопственост и дека пред неколку години истото им било вратено согласно Законот за денационализација, објасни министерот Јанакиевски, и напомена дека по оваа информација, и извршениот увид од страна на Агенцијата за катастар на недвижности, Министерството било известено дека е направен превид во документација.
Според министерот Јанакиевски, Министерството за транспорт и врски, постапувајќи по доставен приговор од страна на сопствениците на земјиштето, согласно член 56 став 7 од Закон за градежно земјиште ја поништило постапката за отуѓување и сите уплатени средства од страна на понудувачот ќе бидат вратени.
Тој потенцираше дека ова е прв ваков случај, каде што е постапено врз основа на неточни податоци, иако до сега се отуѓени повеќе од 1.000 локации.
Земјиштето со површина од 2855 м2, беше продадено на тендер минатата недела, што предизвика негодување од страна на општина Центар и критики во јавноста порад ниската цена за земјиште во строгиот центар на главниот град.
Наддавањето за земјиштето ќе биде поништено, а уплатените 3.296 евра за 2.855 м2 во строгиот центар на градот ќе и бидат вратени на фирмата „Амадеус Стоун ДООЕЛ“.