Партијата на обединети пензионери и граѓани на Македонија (ПОПГМ) предупредува дека лажни анкетари ги посетуваат домовите на пензионерите во скопската општина Кисела Вода и им доставуваат „прашалници“, во кои пензионерите ги внесуваат личните податоци.
Од партијата велат дека ова најверојатно се прави со намера да им ги „украдат“ податоците заради вршење изборни манипулации или за други криминални цели.
Анкетарите се претставувале дека се ангажирани од Сојуз на здруженија на пензионери на Македонија.
Како што велат од партијата, пензионерите требало да пополнат прашалник во кој, покрај другото, внесувале одговор дали користеле бањско лекување, матични броеви, број на личната карта и број на полнолетни членови во семејството.
„Информирајќи ја јавноста за ваквата појава, ги потсетуваме пензионерите дека ваквите „анкети“ не се законски дозволени и дека обично се наменети за остварување криминални цели, а во период на изборна кампања за вршење притисоци врз изборната волја на избирачите. Ги охрабруваме пензионерите секој ваков случај да го пријават во најблиската полициска станица за да се спречат обидите за злоупотреба на личните податоци за незаконски влијанија и за притисоци врз пензионерите поврзани со изборниот процес или за остварување на нивни други криминални цели“, пишува во соопштението на ПОПГМ.