Со 62 гласа „за“, без „против“ и „воздржани“, Собранието денеска го усвои Законот за попис на населението и домаќинствата, кој треба да се одржи во април годинава. Пратениците од редовите на ВМРО-ДПМНЕ не присуствуваа во салата за време на гласањето.
Освен владејачката коалиција, поддршка за законот најавија и од опозициските партии на Албанците- Алијансата за Албанците и Алтернатива.
Дебатата за нацрт-законот предизвика контроверзии и противења меѓу парламентарното мнозинство и опозициската ВМРО-ДПМНЕ. Од партијата најавија дека ќе бара негово поништување преку собирање граѓански потписи.
„Пописот е само статистичка операција која е повеќе за административни потреби и планирање и зад нејзиното спроведување и зад резултатите стојат СДСМ, ДУИ и останатите партии во владејачката коалиција. Стекнатите права на помалубројните народи се веќе стекнати и нив не смее никој да ги оспорува и назадува, без разлика на резултатите од статистичката операција“, изјави вчера премиерот Зоран Заев на прес-конференција.