Во лизгање на земјиштето предизвикано од интензивни врнежи во источниот дел на Мексико, вчера загинаа 38 луѓе, откако нивните куќи биле затрупани од тони кал и камења.
Првичната бројка на жртви беше шест, меѓутоа откако тропската бура Ерл го зафати и источниот регион на земјата, бројката се зголеми на 38.
Најлошо погодена област е Пуебла, каде што официјалните лица велат дека загинале 28 луѓе. Другите 10 жртви настрадале во државата Веракруз.
Се стравува дека врнежите ќе се повторат во наредните неколку дена. Американскиот Национален центар за урагани во неделата изјави дека е формирана нова тропска бура, Хавиер, која во вторник ќе донесе силни ветришта од 75 км/ч и поројни дождови во Мексико.