-Ако не ве стават на велосипед нема да одите напред, ние само вергламе во место со години, рече Никола Попоски пред амбасадорите на земјите членки на ЕУ на денешната седница на Националниот совет за евроинтеграции.
Попоски критички зборуваше за односот на европските земји кон Македонија.
-Земјава повеќе од десет години има препораки за отпочнуваење преговори. Сега зборуваме за нешто што требаше да го добиеме уште во 2005. Замислете некој во 2005 да ни кажеше дека во 2019 ќе разговараме за седнување на иста софра со членките на ЕУ- затоа што ние само тоа го бараме, не да станеме веднаш членки на ЕУ, кажа Попоски.
Тој напомена дека Грција и Бугарија кои биле политички пречки, сега не се противат за почеток на преговорите, а земјава има оценка ,,3“ за подготвеноста и усогласеноста на законите со ЕУ.
-Се претворивме во печатница на закони, за сега Берлин да ни рече: Ќе почнете преговори, ама не сега, а Франција – ќе почнете преговори, ама не вака, туку кога ќе се реструктуира Унијата, рече Попоски.
Попоски исто така напомена дека ,, фрустрацијата ќе расте, а довербата кон ЕУ ќе опаѓа ако нема конкретна одлука.
Бујар Османи, вицепремиерот за евроинтрграции рече дека сега не е потребно да се отвора дебата за кредибилитетот на ЕУ, но ако не се отворат преговори во октомври, тоа ќе го доведе во прашање кредибилитетот на клучните принципи на ЕУ.
Францускиот амбасадор Тимоние порача дека не се согласува со тезата дека е важно да се почнат преговорите, а потоа да се исполнат реформите, туку важно е државата да ги почне преговорите од ,,добра организирана појдовна точка“.
Тој рече периодот до октомври да се искористи за ,, спроведување на реформи со нов елан“.
-Има уште многу работа, но ова не треба да се сфати како критика кон Владата или како обид да додадам вода на воденицата не противниците, рече Тимоние.
За законот за ЈО порача дека опозицијата треба да даде свој придонес затоа што ЕУ ја вреднува и борбата пртив корупцијата.