Секоја сериозна држава треба да има унифициран став на позицијата и опозицијата за клучните прашања за иднината на државата. Досега за жал од страна на опозицијата не видовме став по ниту едно клучно прашање во ова смисла, така беше со Преспанскиот Договор, така беше со Референдумот, така е и за прашањето за односите со Бугарија, истакна во Топ Тема, државниот секретар во МНР Зоран Попов кој додаде дека ова е преважно прашање за дневно политичка пресметка.
-Чудно е што критичарите на значењето на АСНОМ, на придобивките од АСНОМ и НОБ, истите тие кои се оградуваа од Југославија како најцрн период во нашата историја, тие кои ги бришеа македонските херои од скопските улици и кој го оставија Сојузот на борците на улица, денес да ги бранат, вели Попов.
Околу именувањето на Бучковски за специјален претставник на земјава за Бугарија, Попов смета дека Бучковски како поранешен премиер има контакти со официјални лица во Софија и дека сетоа ова води кон релаксација на во последно време „вжештените односи“.
-Мислам дека тој е јасен показател и недвосмислен сигнал за сериозноста и посветеноста на нашата Влада во инвестирање на добрососедски односи со Р. Бугарија. Станува збор за поранешен премиер кој во време на својот мандат имал одлични односи со високите официјални лица на Р. Бугарија во тој период, и сметам дека позитивно ќе се одрази на една нормализација, релаксација на односните базирана на взаемна почит и разбирање, и од друга страна забрзана имплементација на Договорот за добрососедство и соработка, вели Попов.
Билатералните спорови да останат надвор од преговарачкиот процес
Значи, во новата Методологија усвоена во март едногласно од сите земји членки има јасна референца дека, билатералните спорови треба да останат надвор од процесот на преговори. Ризикуваме новата Методологија да биде прекршена уште пред да почне да се применува. Таа референца во Методологијата не е случајна, тоа е напишана врз основа на научени лекции во просецот на пристапување досега, од споровите помеѓу Италија и Словенија, меѓу Словенија и Хрватска, па и ако сакате меѓу Р. Грција и Р. Северна Македонија. Повторувам, став на ЕУ, да бидат решени сите спорови до крајот на преговорите. Значи, не може да влезе земја членка доколку има билатерален спор. Ние зборуваме за почеток на преговори. И уште еднаш, доколку блокадата на Бугарија опстои, ова ќе биде преседан и прекршување на новата Методологија уште пред да почне да се применува, вели Зоран Попов, државен секретар во МНР.